მეგრული კუჭმაჭი ქართული კულინარიის იმ ნაწილს მიეკუთვნება, რომელიც უცხოელებსაც ძალიან მოსწონთ. ასე მომზადებულ კუჭმაჭს ძალიან უხდება ღომი. თუ ჯერ არ დაგიგემოვნებიათ, აუცილებლად დააგემოვნეთ!
ინგრედიენტები:
- 1 კგ საქონლის გული, ღვიძლი, ფილტვი და ფაშვი
- 2-3 თავი ხახვი
- ქინძი და ბროწეული ზემოდან მოსაყრელად
- ქონი ან ზეთი
სანელებლებისთვის
- 1 ს.კ. ხმელი ქინძი
- 2 ს.კ. უცხო სუნელი
- 0,5 ჩ.კ. ხმელი ქონდარი
- 1-2 ცალი დაღერღილი წიწაკა
- 5-8 კბილი ნიორი
- 1-2 ს.კ. მარილი
მომზადების წესი:
- შიგნეულობა გავრეცხოთ რაც შეიძლება კარგად, მოვათავსოთ დიდ ქვაბში, დავასხათ წყალი და დავდგათ ცეცხლზე. ხარშვის დროს მოვქაფოთ. როდესაც მოიხარშება, გადმოვიღოთ და შეგრილება ვაცადოთ. შემდეგ სასურველ ზომაზე დავჭრათ.
- წიწაკას დავუმატოთ ნიორი და მარილი. დავნაყოთ კარგად. მიღებულ მასას დავუმატოთ ქინძი, უცხო სუნელი, ქონდარი და ისევ დავნაყოთ. უნდა მივიღოთ სქელი მასა. ამ სანელებლით შევაზავოთ კუჭმაჭის გამზადებული მასალა.
- ღრმა და სქელძირიან ქვაბში გავაცხელოთ ქონი ან ზეთი. ჩავყაროთ ალყა-ალყა დაჭრილი ხახვი და მოვშუშოთ. დავუმატოთ შეზავებული კუჭმაჭი, კარგად რომ გაცხელდება, მზადაა. ბოლოს მოვაყაროთ წვრილად დაჭრილი ქინძი, ხახვის რგოლები და ბროწეულის მარცვლები.
მოხარშეთ ღომი და მიირთვით გემრიელად!
