იზრდება თქვენს ბოსტანში პომიდორი და პირშუშხა? ჩათვალეთ, იღბლიანი ხართ. ეს ხომ უგემრიელესი ნამზადის ნაკრებია ზამთრისთვის. პირშუშხას ფოთლებით და პომიდვრით მომზადებული სანელებელი ძალიან პიკანტური და არომატული გამოდის. ნებისმიერ კერძს ძალიან ცხარეს და საოცრად გემრიელს ხდის.
ასეთი სანელებელი შეგიძლიათ დაუმატოთ როგორც თევზს, ასევე ხორცს. ბევრი სოუსის და წასახემსებლის მოსამზადებლად შეუცვლელია. ჩათვალეთ, სალათისთვის მზა საკაზმია. ძალიან მოსახერხებელია. უბრალოდ პურს შეგიძლიათ წაუსვათ. ასეთი სენდვიჩი გემრიელ და სწრაფ წასახემსებლად გამოგადგებათ.
როგორ მოვამზადოთ სანელებელი პირშუშხას ფოთლებით და პომიდვრით
სანელებლის მოსამზადებლად ტკბილი ხორციანი პომიდორი გამოიყენეთ. პირშუშხას ფოთლები ძალიან ძველი არ უნდა იყოს. სანელებლისთვის მისი მხოლოდ რბილი ნაწილი გამოიყენეთ. წინააღმდეგ შემთხვევაში პროცესში დამაქუცმაცებელი შეიძლება დააზიანოთ.
ინგრედიენტები:
- 10 პირშუშხას ფოთოლი
- 1 ჩილის წიწაკა
- 50 მლ მზესუმზირის ზეთი
- 1 ჩ/კ მარილი
- 1 კგ პომიდორი
- 1 ნიორი
- 1 ჩ/კ შაქარი
- 1 ჩ/კ ხმელი სუნელი
მომზადების წესი:
1. პომიდორი კარგად გარეცხეთ. მსხვილ ნაჭრებად დაჭერით. ნიორი გაასუფთავეთ. ცხარე წიწაკა გარეცხეთ და რგოლებად დაჭერით.
2. პირშუშხას ფოთლები კარგად გარეცხეთ. გაამშრალეთ და მსხვილად დაჭერით.
3. პომიდორი და ცხარე წიწაკა ხორცსაკეპით ან ბლენდერით დააქუცმაცეთ. პირშუშხას ფოთლები და ნიორიც გაატარეთ. ყველაფერი ერთ თასში მოათავსეთ.
4. მზა ინგრედიენტებს დაუმატეთ მარილი, შაქარი და ხმელი სუნელი. მზესუმზირის ზეთი ჩაასხით. ერთგვაროვანი მასის მიღებამდე აურიეთ.
5. მზა სანელებელი სუფთა მინის ქილებში გადაანაწილეთ. თავსახური მჭიდროდ დაახურეთ. მზადაა!
ასეთი სანელებელი მაცივარში 3 თვემდე შეგიძლიათ შეინახოთ. თუ მომარაგება გსურთ, ცხარე ნარევი საყინულეში შეინახეთ. ასე 1 წელი შეგიძლიათ შეინახოთ. სხვათა შორის, ამ საოცარი სანელებლით თევზის მომზადებას გირჩევთ. თევზის ფილე აიღეთ. საჭიროების შემთხვევაში ძვლებისგან გაწმინდეთ და მსხვილად დაჭერით. თევზს პირშუშხას სანელებელი უხვად წაუსვით და თანაბრად გაანაწილეთ. მარილის და წიწაკის დამატება საჭირო არაა. თევზი სანელებელში ბატატთან ან კარტოფილთან ერთად გამოაცხვეთ, შემდეგ მზა კერძის საოცარი გემოთი ისიამოვნეთ.
