ყოველთვის მშურდა მეგობრების, რომლებიც ფქვილეულს მიირთმევდნენ და წონაში არ იმატებდნენ. ამ მხრივ სირთულეები მაქვს, მაგრამ ტკბილ ცომეულზე უარის თქმა არ შემიძლია. განსაკუთრებით მაშინ, როცა ფუნთუშებს საფუარის ცომზე და ხაჭოთი ვამზადებ.
სანამ ცხვება, მთელი ოჯახი ღუმელის გარშემო იკრიბება, როგორც ფუტკრები თაფლის გარშემო. პირველი პარტია ცხელი იჭმება. არ ვჩხუბობ, რადგან არომატულ ფუნთუშას თავადაც მივირთმევ.
როგორ მოვამზადოთ ფუნთუშები საფუარის ცომით და ხაჭოს შიგთავსით
გავრცელებული მოსაზრების მიუხედავად, რომ საფუარის ცომს დიდი ძალისხმევა სჭირდება, მასთან მუშაობა სასიამოვნოა. ღვეზელისგან განსხვავებით თითოეული ფუნთუშის გაკეთება არ მოგიწევთ, რაც მომზადების დროს მნიშვნელოვნად ამცირებს.
ინგრედიენტები:
- 9 კვერცხი
- 300 გ შაქარი
- 1 კგ ხორბლის ფქვილი
- 530 მლ რძე
- 2 ს/კ თაფლი
- 150-200 გ ქიშმიში
- 2,5 ჩ/კ ვანილის შაქარი
- 1 ს/კ მშრალი საფუარი
- 160 გ კარაქი
- 3 ს/კ მზესუმზირას ზეთი
- 1 კგ ხაჭო
მომზადების წესი:
1. 3 კვერცხი, 120 გ შაქარი და 0,5 ჩ/კ ვანილის შაქარი მიქსერით ათქვიფეთ. მასა მოცულობაში 2–ჯერ უნდა გაიზარდოს.
2. საფუარი, 1 ს/კ შაქარი და 1 ს/კ ფქვილი აურიეთ. 100 გ გამდნარი კარაქი და 500 მლ თბილი რძე დაუმატეთ და აურიეთ. ახლა კვერცხის მასას დაუმატეთ.
3. მზესუმზირას ზეთი და 500 გ ფქვილი დაუმატეთ, კარგად აურიეთ. თაფლი დაუმატეთ, დარჩენილი ფქვილიც მოაყარეთ და აურიეთ. 10-15 წუთით მოზილეთ, სანამ ხელზე აღარ მოგეკვრებათ. პირსახოცი დააფარეთ და 1 საათით თბილ ადგილას გააჩერეთ.
4. ხაჭო, 180 გ შაქარი, 2 ჩ/კ ვანილის შაქარი, 4 კვერცხი, 2 კვერცხის ცილა და 60 გ რბილი კარაქი აურიეთ. ქიშმიშს ცხელი წყალი დაასხით და 15 წუთით გააჩერეთ.
5. ცომი შუაზე გაყავით და თითოეული თხელ მართკუთხა ფირფიტებად გააბრტყელეთ. ხაჭოს შიგთავსი გადაანაწილეთ და ქიშმიში მოაყარეთ. რულეტი დაახვიეთ, კუთხეები შეკარით და ძაფით ულუფებად დაანაწევრეთ.
6. პერგამენტ დაფარებულ საცხობ ფორმაზე ფუნთუშები გადაიტანეთ. პირსახოცი დააფარეთ და 10 წუთით გააჩერეთ. 2 კვერცხის გული და 2 ს/კ რძე აურიეთ. ნარევი ფუნთუშებს წაუსვით. 180 გრადუსამდე გახურებულ ღუმელში 25-30 წუთით აცხვეთ.
მოწითალო და რბილი ფუნთუშები გამოვა. ხაჭოს შიგთავსი შეგიძლიათ სხვა რამით ჩაანაცვლოთ. მაგალითად, ცომს გამდნარი კარაქი წაუსვით და შაქრის და დარიჩინის ნარევი მოაყარეთ. ასე წარმოუდგენლად გემრიელი გამოვა. ასევე დაქუცმაცებული კაკალი ან ჩირი დაუმატეთ. აირჩიეთ ის, რაც მოგწონთ!
