კლასიკური ფაფუკი ბისკვიტი რომ გამოაცხოთ, ახალი პროდუქტების და რეცეპტის ქონა საკმარისი არაა. კიდევ რამდენიმე უნარს უნდა ფლობდეთ და მისი გამოცხობის საიდუმლოებები უნდა იცოდეთ, რომ შეცდომა არ დაუშვათ. ბისკვიტის ცომის შემადგენლობა მინიმუმი პროდუქტებია.
Gastronomia.ge–ს რედაქცია გიამბობთ, როგორ გამოაცხოთ იდეალური ჰაეროვანი ბისკვიტი.
კლასიკური ფაფუკი ბისკვიტი
გიზიარებთ მარტივ და გამოცდილ რეცეპტს.
ინგრედიენტები:
- 5 ს/კ ფქვილი (სავსე)
- 6 ს/კ თეთრი შაქარი
- 5 კვერცხი
- ვანილი (დანის წვერით)
ფხვიერი პროდუქტები ერთი ჭიქით შეგიძლიათ გაზომოთ. შემდეგ ყველაზე საინტერესო იწყება. ბისკვიტის ცომს მოვამზადებთ.
პირველი ვარიანტი
1. კვერცხი თასში ჩატეხეთ, შაქარი დაუმატეთ და დაბალ სიჩქარეზე მიქსერით ათქვიფეთ. ათქვეფის პროცესი მინიმუმ 15 წუთი გრძელდება. მასა მოცულობაში უნდა გაიზარდოს და გაღიავდეს, შაქრის კრისტალები სრულად უნდა გაიხსნას.
2. ფქვილი გაცერით და ვანილი დაუმატეთ. ფქვილი 2-3 ეტაპად ათქვეფილ მასას დაუმატეთ და კოვზით ქვემოდან ზემოთ ფრთხილად აურიეთ, რომ ერთგვაროვანი მასა გამოვიდეს. ცომი მზადაა.
მეორე ვარიანტი
1. კვერცხის გული და ცილა დააცალკევეთ. კვერცხის გულებს შაქრის ნახევარი დაუმატეთ და დაბალ სიჩქარეზე მიქსერით ათქვიფეთ. ღია მასა უნდა მიიღოთ.
2. შემდეგ კვერცხის ცილები დარჩენილ შაქართან ერთად სქელი ქაფის მიღებამდე ათქვიფეთ, როგორც ბეზე. ვანილი და ფქვილი აურიეთ, გაცერით, მშრალი ნარევი კვერცხის გულებს დაუმატეთ. კარგად აურიეთ.
3.მიღებულ მასას ათქვეფილი ცილები თანდათან დაუმატეთ და კურკუტების გაქრობამდე მსუბუქი მოძრაობით აურიეთ.
ფაფუკი ბისკვიტი: სხვა ნიუანსები
ფორმის მომზადება მნიშვნელოვანია. ფორმის ძირს ცხიმი უნდა წაუსვათ, ხოლო გვერდები მშრალი დატოვოთ. სახსნელ ფორმას ძირში პერგამენტი ან ფოლგა ჩააფინეთ. მზა ცომი ფორმაში გადაიტანეთ და კარგად გახურებულ ღუმელში მოათავსეთ.
აქ დამწყებთათვის ნამდვილი კვესტი იწყება. რომელ ტემპერატურამდე გავაცხელოთ ღუმელი? ამ შემთხვევაში როგორც 170, ასევე 200 გრადუსი შესაფერისია. თქვენი ღუმელის მუშაობას დააკვირდით.
სანამ ღუმელთან მუშაობას არ ისწავლით, არა ერთი ბისკვიტი წარუმატებელი შეიძლება გამოვიდეს. დიდი განსხვავება არსებობს გაზქურასა და თანამედროვე ღუმელს შორის, რომელსაც ქვედა და ზედა გამათბობელი ელემენტები აქვს.
ბისკვიტის ცხობის დრო 30-დან 50 წუთამდე მერყეობს. ღუმელის ტიპი და მისი შესაძლებლობები გაითვალისწინეთ. თქვენი შეხედულებისამებრ ცხობის დრო გაზარდეთ ან შეამცირეთ. ღუმელში ორმხრივი გაცხელებით ცომი უკეთ გამოცხვება.
მომზადების სხვა თავისებურებები
- ცომისთვის კვერცხი მაცივრიდან წინასწარ გამოიღეთ. კვერცხის გულის და ცილის დაყოფისას ფრთხილად იყავით: წვეთი გული და ცილოვანი ქაფი არ გამოვა.
- სამუშაო ზედაპირი და მიქსერი კარგად გაამშრალეთ. ღუმელი კარგად გააცხელეთ.
- სანამ ცომი არ გამოცხვება, ღუმელის კარი არ გააღოთ. ტემპერატურის მკვეთრი ცვლილების გამო ბისკვიტის ცომი ვარდება. ძველ ღუმელში დაზიანებული შემამჭიდროებლით ცივი ჰაერი შიგნით შეიძლება მოხვდეს და ბისკვიტი ბრტყელი დარჩეს.
- ბისკვიტის ცომი ღუმელიდან უცებ არ გამოიღოთ. ჯერ კარი ოდნავ გააღეთ, შიგნით ცოტა სუფთა ჰაერი შეუშვით, მხოლოდ ამის შემდეგ ცომეული ღუმელიდან გამოიღეთ.
- ცხელ ბისკვიტზე არაფერი გააკეთოთ. გაცივება აცადეთ და შემდეგ დაჭერით.
გამოცდილი დიასახლისების რჩევები გაითვალისწინეთ, თქვენს ინტუიციას მოუსმინეთ და ბისკვიტი აუცილებლად ფაფუკი და მოწითალო გამოვა.
