ბროკოლის კერძი ყველას არ მოსწონს. მაგალითად, პირადად მხოლოდ რამდენიმე წლის წინ დავაფასე ამ ნათელი ბოსტნეულის გემო. მიყვარს ბროკოლის ორთქლზე მომზადება ან მისგან არომატული სუპპიურეს გაკეთება გორდონ რამსის რეცეპტით. ბრიტანელი შეფმზარეული ნამდვილ კულინარიულ ნიჭს ფლობს. მხოლოდ 2 ინგრედიენტით შედევრს ქმნის. Gastronomia.ge–ს რედაქცია ამ რეცეპტის გამეორებას გირჩევთ. მოგეწონებათ!
ბროკოლის კერძი
ამ ბროკოლის კერძს რამდენიმე თავისებურება აქვს. პირველ რიგში, დაგჭირდებათ მხოლოდ 2 ძირითადი ინგრედიენტი და მარილი. ესაა კომბოსტო და წყალი მოსახარშად. მეორეც, მნიშვნელოვანია გამოიყენოთ ბროკოლის ყვავილები ფესვების გარეშე. ეს მზა წვნიანის გემოსა და ფერზე მოქმედებს.
ინგრედიენტები:
- 2–3 ბროკოლის დიდი თავი
- წყალი
- მარილი გემოვნებით
მომზადების წესი:
1. დიდ ქვაბში წყალი აადუღეთ. სანამ წყალი ცხელდება, ბროკოლის ყვავილები ხიკვს მოაშორეთ. ადუღებულ წყალს მარილი დაუმატეთ, ბროკოლის ყვავილები წყალში ჩადეთ და კიდევ ერთხელ მარილი დაუმატეთ.
2. ქვაბს თავსახური დაახურეთ და ბროკოლი მდუღარე წყალში მაქსიმუმ 3–4 წუთი ხარშეთ. შემდეგ ბროკოლი საწურზე გადაიტანეთ. წყალი, რომელშიც კომბოსტო იხარშებოდა, შეინახეთ.
3. მოხარშული ბროკოლი ბლენდერის ჭიქაში მოათავსეთ. ცოტა ნახარში წყალი დაუმატეთ. წყლის რაოდენობა თქვენი გემოვნებით დაარეგულირეთ. ყველაფერი დამოკიდებულია, როგორი კონსისტენციის სუპპიურეს მიღება გსურთ.
4. ბროკოლი პიურეს მიღებამდე დააბლენდერეთ. მიღებული მასა დააგემოვნეთ. თუ მარილი საკმარისი არაა, დაუმატეთ და ისევ დააბლენდერეთ. მზადაა!
ბროკოლის კერძი: რედაქციის რჩევა
ამ წვნიანის ხიბლი სიმარტივეშია. ველოსიპედის გამოგონება საჭირო არაა, რომ ნამდვილად გემრიელი კერძი მოამზადოთ. აქ ბროკოლს გემოს გახსნა უნდა აცადოთ. ბოსტნეული არ უნდა გადახარშოთ, წინააღმდეგ შემთხვევაში გემოს თვისებები და ფერი შეიცვლება.
გორდონ რამსს მარტივი კერძების და ორიგინალური გაფორმების კომბინაცია უყვარს. ასე ბროკოლის სუპპიურეს ასხამს თეფშში, რომელშიც წინასწარ რამდენიმე ნიგოზს და დახვეწილ ყველს (მაგალითად, ობიანი ყველი) დებს. ზემოდან კერძს ზეითუნის ზეთი მოასხით. თუ სტუმრების გაოცება გსურთ, ბროკოლის სუპპიურე პურში ჩაასხით. მადისაღმძვრელია!
თუ ბრიტანელი შეფმზარეულის რეცეპტმა თქვენზე შთაბეჭდილება ვერ მოახდინა, ყოველთვის შეგიძლიათ კერძის მოდერნიზება. მაგალითად, წვნიანს ნაღები და ყველი დაუმატეთ. სხვა ბოსტნეულის დამატებით უფრო ნოყიერი გახდება. ბროკოლს ხშირად უმატებენ ყვავილოვან კომბოსტოს ან კარტოფილს.
