ორცხობილა არაჟნით და კარაქით მარტივი და სწრაფი ვარიანტია, რომ ოჯახის წევრები გემრიელი დესერტით გაახაროთ. დიდ დროს და ძალას არ დახარჯავთ. განსაკუთრებით სასიამოვნოა, რომ შიგთავსად ძველი მურაბაც შეგიძლიათ გამოიყენოთ. ჩვენს შემთხვევაში გარგარის მურაბა. გემოვნებით ნებისმიერი სხვა რამ შეგიძლიათ დაუმატოთ. Gastronomia.ge–ს რედაქცია გიამბობთ, როგორ გამოაცხოთ რბილი ორცხობილები ნახევარ საათში.
ინგრედიენტები:
- 6 ს/კ არაჟანი
- 100 გ მურაბა
- 30 გ შაქრის ფხვნილი
- 200 გ კარაქი
- 200 გ ფქვილი
- მწიკვი მარილი
მომზადების წესი:
1. რბილი კარაქი და არაჟანი თასში აურიეთ.
2. ფქვილი გაცერით და მარილი დაუმატეთ. მშრალი ინგრედიენტები არაჟნის და კარაქის ნარევს დაუმატეთ.
3. რბილი ცომი მოზილეთ. ხელზე არ უნდა გეკვროდეთ.
4. ფქვილმოყრილ მაგიდაზე ცომი გააბრტყელეთ. ცომი 5 სმ კვადრატებად დაყავით. კვადრატის ცენტრში ჩაის კოვზით ნებისმიერი მურაბა მოათავსეთ. ცომი კონვერტივით გაკეცეთ.
5. ორცხობილები პერგამენტ დაფარებულ საცხობ ფორმაზე გადაიტანეთ. 180 გრადუსზე 15-20 წუთით მომზადებამდე აცხვეთ.
6. კონვერტები მურაბით მზადაა. სურვილის შემთხვევაში, შაქრის ფხვნილი მოაყარეთ. გემრიელად მიირთვით!
არაჟნით და საყვარელი მურაბით ორცხობილის მომზადება ერთგვარი მედიტაციაა. ცომთან მუშაობა მიყვარს, კიდევ უფრო მომწონს იმის ყურება, როგორ მიირთმევენ ოჯახის წევრები ორცხობილებს სიამოვნებით და თან ჩაის აყოლებენ. ოღონდ წონის მატების მეშინია, ორცხობილის ისევ და ისევ გამოცხობა მსურს!
