ჭარხლის მხალი ქართული სამზარეულოს ტრადიციული, პოპულარული კერძია. მხალი ხომ ძალიან უხდება მჭადს და არა მარტო…მოდით ერთად მოვამზადოთ ეს ქართული კერძი.
ინგრედიენტები:
- ჭარხლის ფოთლები – 500 გ
- ჭარხალი – 70 გ
- ნიგოზი – 150 გ
- ცოცხალი ქინძი – 10 გ
- ოხრახუში – 10 გ
- უცხო სუნელი – 1 ჩ.კ.
- ხმელი ქინძი – 1 ჩ.კ.
- ყვითელი ყვავილი – 1 ჩ.კ.
- თეთრი ღვინის ძმარი – 1 ს.კ.
- ნიორი – 1-2 კბილი
- ხახვი – 1 თავი
- მარილი გემოვნებით
- ბროწეული გასაფორმებლად
მომზადების წესი:
- ჭარხლის ფოთლები გაასუფთავეთ, მოაჭერით უხეში ღეროები და ქვაბში ჩააწყვეთ. დაასხით ცხელი წყალი და 1-2 წუთის განმავლობაში ხარშეთ. შემდეგ გადაავლეთ ცივი წყალი. გაცივებული ჭარხლის ფოთლები გაწურეთ და წვრილად დაკეპეთ.
- ცალკე კარგად მოხარშეთ ჭარხალი და სახეხზე გახეხეთ.
- დაჭერით ძალიან წვრილად ხახვი, ცოცხალი ქინძი და ოხრახუში. ნიორი სახეხზე გახეხეთ.
- გაატარეთ ნიგოზი ხორცსაკეპ მანქანაში.
- ჭარხლის დაკეპილი ფოთლები, გატარებული ნიგოზი და გახეხილი ჭარხალი ერთმანეთში აურიეთ და დაამატეთ უცხო სუნელი, ხმელი ქინძი, ყვითელი ყვავილი, გახეხილი ნიორი, მარილი, 1 სუფრის კოვზი ძმარი და 1 სუფრის კოვზი წყალი.
- გააჩერეთ მომზადებული მხალი 30 წუთს, სუფრასთან მიტანის წინ ბროწეულის მარცვლებითა და ცოცხალი ქინძით გააფორმეთ.
