რა საჭიროა ბულიონის კუბების ყიდვა, თუ სახლის პირობებში სწრაფად და მარტივად შეგიძლიათ მოამზადოთ? თან ხარისხში 100% დარწმუნებული იქნებით. არანაირი ზედმეტი დანამატი და ქიმია! ბულიონის კუბები თავად გააკეთეთ და გემრიელ სადილს სწრაფად გაამზადებთ.
მოსამზადებლად ქათმის ბიუჯეტური ნაწილები გამოიყენეთ. ხორციდან კისერი და ფეხები დაგჭირდებათ. ბულიონის კუბები არომატული რომ გამოვიდეს, დაუმატეთ ბევრი ბოსტნეული, დაფნა, წიწაკა და გამხმარი მწვანილი (კამა და ოხრახუში).
ხელნაკეთი ბულიონის კუბები: წვნიანის მომზადება მათი გამოყენებით
ასეთი ნამზადი კარგია იმით, რომ 1 კუბი მთელი ქვაბი წვნიანის მოსამზადებლად საკმარისია. როგორი მოსახერხებელია! კუბები იმდენად ნაჯერი გამოდის, რომ რამდენი ლიტრი წვნიანისთვის მხოლოდ ერთი ცალი დაგჭირდებათ.
ინგრედიენტები:
- 0,5 კგ ქათმის კისერი
- 2 ქათმის წვივი
- 1 კგ ქათმის ფეხები
- 25 მარცვალი შავი წიწაკა
- 2 დაფნის ფოთოლი
- 1 ხახვი
- 6 კბილი ნიორი
- 1,5 სტაფილო
- 150 გ ნიახური
- 0,5 ჩ/კ გამხმარი ოხრახუში
- 0,5 ჩ/კ გამხმარი კამა
მომზადების წესი:
1. ქათმის კისერი, ფეხები და წვივები გამდინარე წყალში კარგად გარეცხეთ და გაამშრალეთ. სტაფილო და ხახვი გაასუფთავეთ. ეს ბოსტნეული და ნიახური მსხვილად დაჭერით. ნიორი გაასუფთავეთ და პატარა ნაჭრებად დაჭერით.
2. დიდ სქელძირიან ქვაბში მოათავსეთ ქათმის ხორცი. დაჭრილი ბოსტნეული, დაფნის ფოთოლი და წიწაკა დაუმატეთ. წყალი დაასხით. სითხე ხორცს და ბოსტნეულს ოდნავ უნდა ფარავდეს. თავსახური დაახურეთ და ქურაზე დადეთ.
3. ადუღების შემდეგ ზომიერ ცეცხლზე 30 წუთი ხარშეთ. შემდეგ ქურა გამორთეთ. ნარევი საწურით გადაწურეთ.
4. გაწურული ბულიონი მანამ ხარშეთ, სანამ მოცულობაში არ შემცირდება (დაახლოებით 3–ჯერ).
5. გამხმარი მწვანილი აიღეთ და კონცენტრირებულ ბულიონს დაუმატეთ. კარგად აურიეთ. ბულიონი ყინულის ფორმებში ჩაასხით და საყინულეში მოათავსეთ. მზადაა!
ასეთი ნამზადი კარგია იმით, რომ ძალიან, ძალიან დიდხანს ინახება. საქმიანი დიასახლისებისთვის იდეალურია! ნატურალური, არომატული და ნაჯერი ბულიონის კუბები თქვენი მხსნელი გახდება.
