კულინარიას განსხვავებულად შეიძლება მიუდგეთ. ზოგისთვის საჭმლის მომზადება ხელოვნებაა, სადაც პროპორციები უნდა იგრძნოთ და ინსტრუქცია მკაცრად დაიცვათ. სხვებისთვის აუცილებლობა, რადგან საჭმელი ორგანიზმს სჭირდება. თავად ოქროს შუალედის პოვნას ვცდილობ. პირადი გამოცდილებით დავრწმუნდი, რომ მარტივი კერძიც უფრო გემრიელი და დახვეწილი შეიძლება გახდეს, თუ ფანტაზიას ჩართავთ. ჩვეული კერძების ნაცვლად ვაცხობ ცხელ ბუტერბროდებს. გემრიელი და არომატულია.
ამ კერძისთვის შეგიძლიათ გამოიყენოთ ნებისმიერი რამ, რაც მაცივარში გაქვთ. თავად სოსისებით მომზადებას გასწავლით, მაგრამ ძეხვით, ლორით, ხორცის ნაჭრებით შეგიძლიათ მოამზადოთ. ხორცის საფუძველს დაუმატეთ ნებისმიერი ბოსტნეული: კიტრი (მწნილი ან ახალი), ბულგარული წიწაკა, ბადრიჯანი. გემრიელი იქნება, მენდეთ!
როგორ მოვამზადოთ ცხელი ბუტერბროდები სოსისებით
ვიცი, რომ ცხელი ბუტერბროდების მიკროტალღურ ღუმელში მომზადება უფრო მოსახერხებელია, თუმცა ღუმელში გამოცხობას დაჟინებით გირჩევთ. ბევრად გემრიელი გამოდის. საცხობი ფორმის გარეცხვა რომ არ მოგიწიოთ, პერგამენტი დააფარეთ. ინგრედიენტები თანაბრად გამოცხვება, ხოლო პური მოწითალო ქერქით დაიფარება.
ინგრედიენტები:
- 3 რძიანი სოსისი
- 1 კონა მწვანილი
- მაიონეზი გემოვნებით
- 70 გ ხმელი ყველი
- ბატონი პური გემოვნებით
- 1 პომიდორი
- 2 კბილი ნიორი
- კეტჩუპი გემოვნებით
- შავი წიწაკა დაფქული გემოვნებით
მომზადების წესი:
1. სოსისი, პომიდორი, მწვანილი წვრილად დაჭერით, ნიორი დაჭყლიტეთ. ინგრედიენტებს აურიეთ, მაიონეზი და კეტჩუპი მოასხით და აურიეთ.
2. პური ნაჭრებად დაჭერით, შიგთავსი მოათავსეთ და წიწაკა მოაყარეთ. ზემოდან გახეხილი ყველი მოაყარეთ.
3. ბუტერბროდები საცხობ ფორმაზე გადაიტანეთ. 200 გრადუსამდე გახურებულ ღუმელში 10 წუთით აცხვეთ.
ცხელი ბუტერბროდები ყველით საუზმეზე, წასახემსებლად, სადილზე წვნიანის ან სალათის დანამატად შეგიძლიათ მიირთვათ. ბატონის ნაცვლად სხვა პური შეგიძლიათ გამოიყენოთ. თუ წასახემსებელს სადღესასწაულო სუფრისთვის ამზადებთ, ბაგეტი აიღეთ. ასე მეტ ბუტერბროდს მოამზადებთ. ყველიც გემოვნებით აირჩიეთ. სასურველია, აირჩიოთ ყველი, რომელიც კარგად დნება.
