Gastronomia.ge–ს რედაქცია გთავაზობთ ქათმის რულეტს შიგთავსით, რომლის დახმარებით მენიუს განახლებას შეძლებთ. ძეხვზე სასარგებლო და გემრიელია. ღუმელში ცხვება და საოცარ შედეგს იძლევა.
მდოგვისა და იოგურტის სოუსი რულეტს იდეალურს ხდის. ხორცი ნაზი, ნოყიერი ხდება. პომიდვრის, ყველის და მწვანილის შიგთავსი საოცრად ავსებს. ზედმეტი კილოგრამების მომატების არ შეგეშინდეთ.
ინგრედიენტები:
- 3 ქათმის ფილე
- 1 ს/კ იოგურტი
- 1 ჩ/კ მდოგვი
- 1-2 კბილი ნიორი
- 1 პატარა პომიდორი
- 150 გ ყველი
- რეჰანი და მწვანე ხახვი გემოვნებით
- მარილი და წიწაკა გემოვნებით
მომზადების წესი:
1. გარეცხილი ფილე შუაზე გაჭერით და დაბეგვეთ. მარილი და წიწაკა მოაყარეთ.
2. იოგურტი, მდოგვი და დაჭყლეტილი ნიორი აურიეთ. სოუსი ფილეს ერთ მხარეს წაუსვით.
3. პომიდორი დაჭერით და მარილი მოაყარეთ. ყველის ნახევარი ნაჭრებად დაჭერით, მეორე ნახევარი გახეხეთ. მწვანე ხახვი და რეჰანი წვრილად დაჭერით. თუ მწვანილი არ გაქვთ, მის გარეშე მოამზადეთ, მაგრამ ასე უფრო გემრიელია.
4. ხორცის კიდეში პომიდორი, მწვანილი და ყველი დადეთ. რულეტი დაახვიეთ.
5. საცხობ ფორმას მცენარეული ზეთი წაუსვით. რულეტები დააწყვეთ. 180 გრადუსზე 25 წუთით აცხვეთ.
6. გახეხილი ყველი მოაყარეთ და კიდევ 5 წუთით აცხვეთ. ქათმის რულეტი შიგთავსით მზადაა.
ნაზი, წვნიანი და არომატული კერძი სუფრაზე შეგიძლიათ გაიტანოთ. სურვილის შემთხვევაში შიგთავსი შეცვალეთ. იდეალურია ყოველდღიური ან სადღესასწაულო სუფრისთვის.
