Gastronomia.ge-ს რედაქცია გთავაზობთ გემრიელ წასახემსებელს – ტარტალეტი სოკოს შიგთავსით. ძალიან გემრიელი, ნაზი და მადის აღმძვრელი გამოდის. მისი მომზადება წარმოუდგენლად მარტივია: მინიმუმი ინგრედიენტები, დრო და ძალა დაგჭირდებათ, რომ შესანიშნავი შედეგი მიიღოთ. მოცემული ინგრედიენტების რაოდენობა 15 ტარტალეტზე გეყოფათ. რეკომენდებულია, მარაგით მოამზადოთ: სუფრიდან წამებში გაქრება და დამატებას მოგთხოვენ როგორც უფროსები, ასევე ბავშვები. აუცილებლად სცადეთ: რეცეპტი პირველივე გასინჯვაზე დაგიპყრობთ.
ინგრედიენტები:
- 15 ტარტალეტი
- 300 გრ ახალი ქამა სოკო
- 1 თავი საშუალო ზომის ხახვი
- 2 კარგად მოხარშული კვერცხი
- 2 მდნარი ყველი
- 2 კბილი ნიორი
- პატარა კონა მწვანე კამა
- მაიონეზი გემოვნებით
- მარილი და დაფქული შავი წიწაკა გემოვნებით
- რაფინირებული მცენარეული ზეთი შესაწვავად
მომზადების წესი:
- კვერცხი ქვაბში გადაიტანეთ, წყალი დაასხით და ხარშეთ. წყლის ადუღებიდან 8 წუთში გაზქურიდან გადმოდგით, ცივი წყალი დაასხით და სრულად გააგრილეთ.
- ამ დროში საშუალო ზომის ხახვი გაასუფთავეთ და ძალიან წვრილად დაჭერით.
- გახურებულ ტაფაზე ცოტა უსუნო მცენარეული ზეთი დაასხით, გააცხელეთ და ხახვი მოათავსეთ. საშუალო ცეცხლზე ოქროსფერ შეფერილობამდე შეწვით.
- ახალი ქამა სოკო გარეცხეთ, გააშრეთ და პატარა კუბებად დაჭერით.
- როგორც კი, ხახვი შეიწვება, სოკო დაუმატეთ. აურიეთ, სოკოს შეწითლებამდე შეწვით. მარილი და წიწაკა გემოვნებით მოაყარეთ, აურიეთ და ცეცხლიდან გადმოდგით.
- თეფშზე ქაღალდის პირსახოცი დააფარეთ და შემწვარი სოკო გადაიტანეთ, რომ ზედმეტი ცხიმი მოაშოროთ. სრულ გაგრილებამდე გააჩერეთ.
- გაცივებულ კვერცხს ნაჭუჭი მოაშორეთ და წვრილ სახეხზე გახეხეთ. კვერცხს 2 მდნარი ყველი დაახეხეთ.
- კვერცხს და ყველს დაუმატეთ დაპრესილი ნიორი, შემწვარი სოკო და ხახვი, დაქუცმაცებული მწვანე კამა. მარილი და წიწაკა გემოვნებით მოაყარეთ, მაიონეზით მორთეთ და აურიეთ.
- მიღებული მასით ტარტალეტები გაავსეთ, მწვანილის ტოტებით გააფორმეთ და სუფრაზე გაიტანეთ.
- გემრიელად მიირთვით!
რჩევა: ტარტალეტები სოკოს შიგთავსით უშუალოდ სუფრაზე გატანის წინ გაავსეთ, რომ არ დალბეს და უგემური არ გახდეს.
