1 ჭიქა უგემრიელესი ქართული ღვინო, ნიგვზიანი ბადრიჯანი და სასიამოვნო კომპანია მაჩვენებელია, რომ ვახშამი დიდებულად ჩაივლის. უკვე წარმოიდგინეთ? მაშინ შაბათ–კვირას ბადრიჯნის რულეტის მომზადებას გირჩევთ.
ქართული წასახემსებელი ცხარე კერძების მოყვარულებს მოეწონებათ. ბოსტნეულის რულეტის შიგთავსი ძალიან ცხარე და საკმარისად პიკანტურია. სიცხარის დონე დამოუკიდებლად შეგიძლიათ დაარეგულიროთ, ამა თუ იმ რაოდენობის წითელი წიწაკის დამატებით.
როგორ მოვამზადოთ ბადრიჯანი ნიგვზით
სანამ მთავარი ინგრედიენტის შეწვას დაიწყებთ, მარილიან წყალში ჩაალბეთ. ამ კერძის მოსამზადებლად აუცილებელი ეტაპია. ასე ბადრიჯანი ტაფაზე შეწვის დროს ბევრ ზეთს აღარ შეიწოვს.
ინგრედიენტები:
- 4 ბადრიჯანი
- 4 კბილი ნიორი
- მწიკვი დაფქული წითელი წიწაკა
- მარილი გემოვნებით
- 1 ხახვი
- 200 გ ნიგოზი
- 1 კონა ოხრახუში
- 1 კონა ქინძი
- მწიკვი ქინძის სუნელი
- მწიკვი ხმელი სუნელი
- მზესუმზირის ზეთი გემოვნებით
მომზადების წესი:
1. ბადრიჯანი გამდინარე წყალში კარგად გარეცხეთ. სიგრძეზე თხელ ფირფიტებად დაჭერით. ბოსტნეული ღრმა თასში გადაიტანეთ. წყალი დაასხით და მარილი დაუმატეთ. 20 წუთი ოთახის ტემპერატურაზე გააჩერეთ.
2. ბადრიჯანი ქაღალდის პირსახოცით გაამშრალეთ. ცხელ ტაფაზე მზესუმზირის ზეთში ორივე მხრიდან ოქროსფერ შეფერილობამდე შეწვით. ბოსტნეული ქაღალდის პირსახოცზე გადაიტანეთ, რომ ზედმეტი ცხიმი მოაშოროთ.
3. შიგთავსი მოამზადეთ. ხახვი გაასუფთავეთ. ხახვი და ნიგოზი დააქუცმაცეთ, ბლენდერი ან ხორცსაკეპი მანქანა გამოიყენეთ. ქინძი და ოხრახუში გარეცხეთ, მწვანილი წვრილად დაჭერით. ხახვის და ნიგვზის ნარევს დაუმატეთ მწვანილი, ქინძის სუნელი, წითელი წიწაკა, ხმელი სუნელი და მარილი.
4. ნიორი გაასუფთავეთ. დაჭყლიტეთ და დანარჩენ ინგრედიენტებს დაუმატეთ. ერთგვაროვანი მასის მიღებამდე კარგად აურიეთ. თუ მასა ძალიან სქელია, ცოტა ცივი წყალი დაასხით და ისევ აურიეთ.
5. ბოსტნეულის ფირფიტის კიდეზე ცოტა შიგთავსი გადაიტანეთ. შემწვარი ბადრიჯანი რულეტივით დაახვიეთ. დანარჩენ ინგრედიენტებზე ასე გაიმეორეთ. მზადაა!
კერძი 1 საათი მაცივარში შეინახეთ, რომ ბადრიჯანი მთელი არომატით კარგად გაივსოს. შემდეგ რულეტები ახალი მწვანილით მორთეთ და ბროწეულის მარცვლები მოაყარეთ. გემრიელად მიირთვით!
