დღეს ჩვენი რედაქცია გასწავლით ერთ – ერთი სასარგებო კერძის მომზადებას. ლობიოს გუფთის ორი შესანიშნავი რეცეპტი თქვენს ხელთაა.
ინგრედიენტები:
- ლობიო 500 გ
- ხახვი 2-3 თავი
- ნიგოზი 100 გ
- ქინძი 60 გ
- პიტნა 30 გ
- ყვითელი კოჭა 1 ჩაის კოვზი
- ზეთი ან ერბო 5 სუფრის კოვზი
- ლობიოს ნახარში 0,5 ლ
- წიწაკა და მარილი გემოვნებით
მომზადების წესი:
- ხმელი ლობიო მოვხარშოთ და გადავწუროთ.
- მარცვლები გავატაროთ ხორცსაკეპ მანქანაში და კარგად ავზილოთ.
- შევაზავოთ ზეთში ან ერბოში მოშუშული დაკეპილი ხახვით, წვრილად დაჭრილი ქინძით, პიტნით, შავი პილპილით, დაფქული ყვითელი კოჭით და მარილით.
- გავაკეთოთ პატარა გუნდები, ამოვავლოთ ხორბლის ფქვილში და შევწვათ ცხიმში.
- შემწვარი ცხელი გუფთები ჩავალაგოთ ღრმა ჭურჭელში, ზემოდან მოვასხათ ცხელი საწებელი და მოვაყაროთ დაჭრილი ახალი კამა.
საწებლის მომზადება:
წვრილად დაჭრილი ხახვი მოვშუშოთ ზეთში. დავუმატოთ ხორბლის ფქვილი და გავაგრძელოთ მოშუშვა. დავუმატოთ ნელ-ნელა მორევით ლობიოს ნახარში, ღვინის ძმარი, შავი პილპილი, დანაყილი ნიგოზი, დაკეპილი ახალი ქინძი, მარილი და ვადუღოთ 5 წთ. საწებელი მზადაა.
მეორე ვარიანტი
ინგრედიენტები:
- ლობიო 500 გ
- ნიგოზი 100-150 გ
- მიხაკ-დარიჩინი 1 ჩაის კოვზი
- ქინძის მარცვლები 2 ჩაის კოვზი
- ხახვი 1-2 თავი
- ნიორი 2-3 კბილი
- ქინძი და ოხრახუში 30-30 გ
- მარილი გემოვნებით
მომზადების წესი:
- ხმელი ქინძის მარცვლები, ნიგოზი და მიხაკ-დარიჩინი დავნაყოთ მშრალ როდინში.
- შემდეგ ჩავანაყოთ წვრილად დაჭრილი ნიორი და ხახვი.
- გადმოვიღოთ ჯამში, მოვზილოთ ენერგიულად, გამოვხადოთ ნიგვზის ზეთი და ცალკე მოვათავსოთ ფინჯანზე.
- ხორცსაკეპში გატარებული ლობიოს ავურიოთ საკაზმი, მოვამზადოთ პატარა გუნდები და დავაწყოთ თეფშზე.
- ზემოდან დავასხათ ნიგვზისგან გამოხდილი ზეთი.
- თეფშის ნაპირებზე შემოვალაგოთ დაჭრილი ახალი ქინძი და ოხრახუში.
გემრიელად მიირთვით!
