ვაშლის ოლადები გერმანული რეცეპტით. საოცრად ფაფუკი გამოდის

261

წელს ვაშლის კარგი მოსავალი ავიღე. მისგან ბევრი რამ მოვამზადე. ახლა რაღაც ახალი უნდა გამოვცადო. ერთ–ერთ ძველ წიგნში საინტერესო რეცეპტი ვიპოვე „ვაშლის ოლადები გერმანულად“. მოვამზადე და შედეგით კმაყოფილი დავრჩი. წვეთი სოდის და გამაფხვიერებლის გარეშე საოცრად ფაფუკი და ნაზი გამოდის.

ოლადები გერმანულად

ინგრედიენტები:

  • 100 მლ რძე
  • 130 გ ხორბლის ფქვილი
  • 250 გ ვაშლი
  • მწიკვი მარილი
  • დარიჩინი გემოვნებით
  • 2 კვერცხი
  • 60 გ შაქარი
  • 1 ჩ/კ ლიმონის წვენი
  • ლიმონის ცედრა გემოვნებით
  • ვანილი გემოვნებით

მომზადების წესი:

1. რძეში მარილი და შაქარი გახსენით. კვერცხი გარეცხეთ, ცალკე ათქვიფეთ. კარგად აურიეთ, რომ კვერცხის გული და ცილა შეერთდეს. შემდეგ რძეს დაუმატეთ.

2. ვაშლის ოლადები ფაფუკი რომ გამოვიდეს, ფქვილი გაცერით. ამის შემდეგ კვერცხი–რძის მასას დაუმატეთ. სათქვეფით ან მიქსერით დაბალ სიჩქარეზე ერთგვაროვანი მასის მიღებამდე ათქვიფეთ.

3. დესერტი განსაკუთრებით ნაზი გამოვა, თუ ვაშლს გათლით. თუ ჩქარობთ, დატოვეთ. ხილი პატარა კუბებად დაჭერით. უმჯობესია ტკბილი ვაშლი გამოიყენოთ.

4. ვაშლის კუბები და თხევადი ცომი აურიეთ.

5. თუ დესერტი ციტრუსის ნოტებით მოგწონთ, ლიმონის ცედრა გახეხეთ და ცოტა ლიმონის წვენი დაუმატეთ. თუ ვანილის არომატი მოგწონთ, ვაშლის ოლადებს ეს სანელებელი დაუმატეთ.

6. ცომი მზადაა. შეწვა დაიწყეთ. ტაფაზე მცენარეული ზეთი გააცხელეთ (პირადად, ზეითუნის ზეთს ვიყენებ, რადგან მასში კანცეროგენები არ შედის. ცომი სუფრის კოვზით გადაიტანეთ. ორივე მხრიდან ოქროსფერ შეფერილობამდე შეწვით.

7. მზა დესერტი ქაღალდის პირსახოცზე გადაიტანეთ, რომ ზედმეტი ზეთი მოშორდეს.

8. შაქარი და დარიჩინი გასაფორმებლად აურიეთ. სანამ ოლადები ცხელია, თეფშზე გადაიტანეთ და ნარევი მოაყარეთ. დესერტი მზადაა!

ოლადების რეცეპტი იმდენად მარტივია, რომ მის მომზადებას ბავშვებიც შეძლებენ. განსაკუთრებით მომწონს, რომ მასში არ შედის სოდა, რომელიც ცომეულს ყოველთვის სპეციფიკურ გემოს აძლევს. ასეთი დესერტი საუზმეზე ძალიან გემრიელია. ასევე სამსახურში წასახემსებლად შეგიძლიათ წაიღოთ.