ბოზბაშს კახეთის სხვადასხვა კუთხეში სხვადასხვანაირად აკეთებენ. თელავში იციან გუფთა-პამიდორთან ერთად, ახმეტაში – გუფთების გარეშე, ბლომად ხორცით, მარტყოფში-უპამიდვრო, ბევრი ქინძით და ა.შ.
ჩვენ დღეს ერთ-ერთ ვარიანტს შემოგთავაზებთ.
გუფთა-ბოზბაში
ინგრედიენტები:
- ხორცი 1 კგ
- დუმა 100 გ
- ხახვი 2-3 თავი
- ბრინჯი 5 სუფრის კოვზი
- ქინძი 50 გ
- მარილი და შავი პილპილი გემოვნებით
- ტარხუნა 50 გ
- ზაფრანა 50 გ
- კვერცხი 2 ცალი
- დარიჩინი 1 ჩაის კოვზი
მომზადების წესი:
- ცხვრის ან ბატკნის ხორცს გავაცალოთ რბილი ნაჭრები.
- დარჩენილი ძვლები და დუმა ჩავყაროთ ქვაბში, დავასხათ წყალი და დავდგათ მოსახარშად.
- წამოდუღებისას მოვხადოთ ქაფი.
- ნახევარი საათი ვხარშოთ, შემდეგ ამოვიღოთ ძვლები და დუმა, ხოლო წვენი გადავწუროთ.
- ცალკე მოვამზადოთ გუფთები: რბილი ხორცი დავკეპოთ წვრილად ხახვთანე ერთად (ან გავატაროთ ხორცსაკეპში). შევაზავოთ მარილით, დაფქული შავი პილპილით და დარიჩინით.
- ასე მომზადებულ ხორცს დავახალოთ კვერცხი, ავურიოთ, გავაკეთოთ პატარა გუნდები და დაფქულ ბრინჯში ამოვავლოთ.
- ქვაბში ჩავასხათ გაწურული წვენი. ჩავყაროთ შიგ მოხარშული, წვრილად დაკეპილი დუმა, წვრილად დაჭრილი ხახვი და 1 სუფრის კოვზი დაფქული ბრინჯი.
- დავდგათ მოსახარშად. როცა ადუღდება შიგ ჩავყაროთ წინასწარ გამზადებული გუფთები და ვხარშოთ.
- ხორცი რომ მოიხარშება, ცეცხლიდან გადმოვდგათ, ოდნავ გავაგრილოთ და შევაზავოთ ბოზბაშის წვენში გახსნილი ზაფრანით, წმინდად დაჭრილი ქინძით და ტარხუნით, მარილით.
- კიდევ ერთხელ წამოვადუღოთ და მივიტანოთ სუფაზე.
