ჩვეულებრივ, ბისკვიტს კარაქის გარეშე ამზადებენ, მაგრამ ვანილის ბისკვიტის რეცეპტი ოდნავ განსხვავდება, რადგან ცოტა კარაქს უმატებენ. კარაქზე მომზადებული ბისკვიტი ნაზი და ფაფუკი გამოდის, თან არ იფშვნება. Gastronomia.ge-ს რედაქცია გირჩევთ ასე მომზადება აუცილებლად სცადოთ.
ინგრედიენტები:
- 4 კვერცხი
- 130 გრ შაქრის ფხვნილი
- 130 გრ ფქვილი
- 1 ჩ/კ ვანილის ექსტრაქტი
- 1 ჩ/კ გამაფხვიერებელი
- მწიკვი მარილი
- 40 გრ კარაქი
მომზადების წესი:
- კვერცხის ცილას მწიკვი მარილი და ნახევარი შაქარი დაუმატეთ. მიქსერით მაღალ სიჩქარეზე მყარი ქაფის მიღებამდე ათქვიფეთ.
- კვერცხის გული, შაქარი და ვანილის ექსტრაქტი ცალკე ათქვიფეთ. კვერცხის გული ცოტა უნდა გაღიავდეს და მოცულობაში გაიზარდოს.
- ამის შემდეგ ათქვეფილი კვერცხის გული და ცილა სილიკონის ჯოხით ნაზად აურიეთ. ფქვილი და გამაფხვიერებელი გაცერით, სასურველია 3 ნაწილად დაუმატოთ.
- ყოველჯერზე ჯოხით აურიეთ, ძალიან ნაზად და ფრთხილად გააკეთეთ, რომ ცომმა ჰაეროვნება არ დაკარგოს.
- კარაქი მიკროტალღურ ღუმელში, ჭურჭელში ან წყლის ორთქლზე გაადნეთ და ოთახის ტემპერატურამდე გააგრილეთ, ოდნავ თბილი უნდა იყოს. წინასწარ გააკეთეთ.
- კარაქი ცომს დაუმატეთ და კიდევ ერთხელ აურიეთ.
- ცომი ძალიან წელვადი, პრიალა და მდიდრული გამოვა.
- 18 სმ დიამეტრის ფორმას პერგამენტის ქაღალდი ჩააფინეთ და ცომი ჩაასხით.
- 180 გრადუსამდე გახურებულ ღუმელში 30 წუთით აცხვეთ. მზაობა ხის ჩხირით შეამოწმეთ.
- გემრიელად მიირთვით!
