მერენგა ან, როგორც ჩვენთან ამბობენ, ბეზე დახვეწილი დესერტია, რომელიც შეიძლება იყოს დამოუკიდებელი დესერტი და სხვადასხვა ტორტისა და ნამცხვრისთვის გასაფორმებელი.
მსუბუქი, პირში მდნობი, ფხვიერი დესერტის მომზადება რთული არაა, თუ Gastronomia.ge-ს რამდენიმე მარტივ წესს დაიცავთ.
ინგრედიენტები:
- 3 კვერცხის ცილა
- 100 გრ შაქარი
- 8 გრ ვანილის შაქარი
- მწიკვი მარილი
- 100 გრ შაქრის ფხვნილი
- 5 წვეთი ლიმონის წვენი
- სურვილის შემთხვევაში შეგიძლიათ საკვები საღებავით შეღებოთ.
მომზადების წესი:
ყურადღება! ჭურჭელი და ნებისმიერი სხვა აქსესუარი, რომელსაც ბეზეს მოსამზადებლად გამოიყენებთ, მშრალი უნდა იყოს.
- კვერცხის გული და ცილა დააცალკევეთ. კვერცხის ცილაში არც ერთი წვეთი კვერცხის გული არ უნდა მოხვდეს.
- კვერცხის ცილა მიქსერით საშუალო სიჩქარეზე აქაფებამდე ათქვიფეთ. მწიკვი მარილი და ლიმონის წვენი (ლიმონმჟავა) დაუმატეთ, რომ კარგად აითქვიფოთ.
- ათქვეფა გააგრძელეთ და ნაწილ–ნაწილ შაქარი დაუმატეთ.
- მიქსერის ბრუნვა თანდათან მაქსიმალურ სიჩქარემდე გაზარდეთ.
- ცილოვანი მასა შაქრის სრულად გახსნამდე ათქვიფეთ.
- ამის შემდეგ ნაწილ–ნაწილ შაქრის ფხვნილი დაუმატეთ და ათქვეფა გააგრძელეთ.
- ცილოვანი მასა მყარი ქაფის მიღებამდე ათქვიფეთ. (დაახლოებით 12 წუთი სჭირდება).
- ათქვეფილი ცილოვანი მასა საკონდიტრო ტომარაში მოათავსეთ.
- საცხობ ფორმას პერგამენტის ქაღალდი დააფინეთ და საკონდიტრო ტომრიდან ბეზეს ფორმები დააწყვეთ.
- 100 გრადუსამდე გახურებულ ღუმელში ბეზე 2 საათით გამოაშრეთ.
- 2 საათის შემდეგ მერენგას მომზადება შეამოწმეთ. ის მშრალი უნდა იყოს.
- ღუმელი გამორთეთ, ბეზე ღუმელში სრულ გაგრილებამდე დატოვეთ. გემრიელად მიირთვით!
