ინტერნეტ სივრცეში საკმაოდ საინტერესო რეცეპტს გადავაწყდი. ინგრედიენტების რაოდენობა ცოტა შევცვალე. მის მომზადებას გირჩევთ, ძალიან გემრიელი დესერტი გამოდის, რომელიც ბავშვებს და უფროსებს ერთნაირად მოეწონება.
ინგრედიენტები:
- 500 გრ ფენოვანი ცომი (უსაფუარო)
- 3 მსხალი
სიროფისთვის:
- 4 ჭიქა წყალი
- 1 ჭიქა შაქარი
- 4 ს/კ მწარე თაფლი
- 1 ჩ/კ ვანილის შაქარი
- 1 ჩ/კ დარიჩინი
მომზადება:
- მსხალი გათალეთ, ყუნწი არ მოაწყვიტოთ.
- სქელ ძირიან ქვაბში სიროფის ყველა ინგრედიენტი მოათავსეთ. ადუღებამდე მიიყვანეთ.
- გათლილი მსხალი მოათავსეთ და საშუალო ცეცხლზე 20 წუთით ხარშეთ. დრო მსხლის სიმწიფეზეა დამოკიდებული. მე 20 წუთი ვხარშავდი. მსხალი რბილი, სიროფით გაჟღენთილი უნდა იყოს, მაგრამ არა გადახარშული.
- მზა მსხალი თეფშზე გადაიტანეთ და გააგრილეთ.
- სიროფი საშუალო ცეცხლზე ხარშეთ. ქვაბს თავსახური არ დაახუროთ. სიროფი 2-3-ჯერ უნდა აადუღოთ. გაგრილების შემდეგ საშუალო კონსისტენციის სიროფი უნდა მიიღოთ, რომელიც არც თხელი და არც ძალიან სქელი არ იქნება.
- ცომი ერთი მიმართულებით ოდნავ გააბრტყელეთ.
- 1-1,5 სმ სიგანის გრძელ ზოლებად დაჭერით.
- მსხალი თეფშზე მოათავსეთ, თუ მისი სწორად გაჩერება გიჭირთ, შეგიძლიათ ქვედა ნაწილი მოაჭრათ, რომ სწორად დადება შეძლოთ.
- მსხალზე ფენოვანი ცომის ზოლი შემოახვიეთ. ქვედა ნაწილიდან დაიწყეთ.
- ბოლომდე ცომში გაახვიეთ (ზოლების ბოლოები ერთმანეთს მიამაგრეთ).
- მზა მსხალი პერგამენტ დაფარებულ საცხობ ფორმაზე დააწყვეთ.
- 200 გრადუსამდე გახურებულ ღუმელში 20 წუთით აცხვეთ, სანამ ცომი მსუბუქ ოქროსფერ შეფერილობას არ მიიღებს.
- გააგრილეთ.
- სადესერტო თეფშს ცოტა სიროფი მოასხით.
თეფშის ცენტრში ცომიანი მსხალი მოათავსეთ და დანა-ჩანგალთან ერთად სუფრაზე გაიტანეთ. ჩემი აზრით, მსხალი ცოტა ტკბილია და სიმჟავე აკლია. სწორედ ამიტომ მზა მსხლის დესერტს გვერდით წითელი მოცხარის ჟელე დავუდე, ზუსტად ის გამოვიდა, რაც მინდოდა. გემრიელად მიირთვით!
