ცხობის დიდი მოყვარული არ ვარ, ამიტომ ჩემს დაბადების დღეზე ტორტი „პანჩო“ გავაკეთე. ოჯახის წევრები და სტუმრები აღფრთოვანებულნი დარჩნენ. რამდენიმე დღის წინ შვილიშვილი მეხვეწა, რომ მისთვის და მისი მეგობრებისთვის ტორტი „პანჩო“ გავაკეთო. „ბებო, გთხოვ, გააკეთე“ – მემუდარებოდა. მაშინვე დავთანხმდი, რადგან ტორტი ცხობის გარეშე მარტივად მზადდება.
Gastronomia.ge–ს რედაქცია გიამბობთ, როგორ მოამზადოთ ტორტი „პანჩო“ ცხობის გარეშე.
ინგრედიენტები:
- 500-600 გ მზა ბისკვიტი ან ორცხობილა
- 300-400 გ გაყინული კენკრა კურკის გარეშე
დასანამად:
- 500 გ არაჟანი 20% ან 15% ცხიმიანობით
- 150-180 გ შაქარი (არასრული ჩაის ჭიქა)
- 1 ს/კ კაკაო
- 5 ს/კ წყალი
ტორტის დასაფარად:
- 100 გ არაჟანი
- 2 ს/კ შაქარი
ჭიქურისთვის:
- 1 ს/კ შაქარი
- 1 ს/კ კაკაო
- 3 ს/კ წყალი
მომზადების წესი:
1. კონუსის ფორმის თასში, რომლის ძირის დიამეტრიც კიდეზე უფრო ვიწროა, შესაფუთი პარკი ჩააფინეთ. გვერდებზე მეტი პარკი დატოვეთ, რომ ტორტის შესაფუთად გეყოთ.
2. ბისკვიტი სახლში გამოაცხვეთ ან მზა ფენები იყიდეთ და დააქუცმაცეთ. ბისკვიტის ნატეხები სამ ნაწილად დაყავით. თასის ძირში უფრო ნაკლები ბისკვიტი ჩაყარეთ, რადგან მისი დიამეტრი პატარაა.
3. კრემისთვის არაჟანი და შაქარი შაქრის გახსნამდე ათქვიფეთ. კოვზი კაკაო და ხუთი კოვზი წყალი მიკროტალღურში 30 წამით შედგით. შემდეგ ოდნავ შეაგრილეთ და არაჟანს დაუმატეთ. კარგად აურიეთ.
4. ფენები ჩააწყვეთ. ჯერ ბისკვიტის ფენა, შემდეგ არაჟანი–შოკოლადის კრემი. ზემოდან ნახევარზე ცოტა ნაკლები კენკრა დაუმატეთ. თუ კენკრა ცოტა შაქართან ერთად გაყინული იყო, შაქრის მოყრა აღარ სჭირდება. თუ არა, ცოტა მოაყარეთ.
5. ფენები გაიმეორეთ: ბისკვიტი, კრემი. ორივეს რაოდენობა გაზარდეთ, რადგან თასის დიამეტრი გაფართოვდა. დარჩენილი კენკრა, ისევ ბისკვიტი და ბოლოს კრემი დაუმატეთ.
6. ზედაპირი სპატულით გაასწორეთ. შესაფუთი პარკი დააფარეთ და მაცივარში 2–3 საათით შეინახეთ. ამ დროში ტორტი კარგად დაინამება.
7. თასს ზემოდან დიდი ბრტყელი თეფში დაადეთ და გადმოატრიალეთ. ასე ტორტს თასიდან თეფშზე გადმოიტანთ. თითქმის მზა ტორტს შესაფუთი პარკი მოაშორეთ და ზემოდან წასასმელი კრემი მოამზადეთ.
8. 100 გ არაჟანი და 2 ს/კ შაქარი ათქვიფეთ. მიღებული კრემი ტორტს ყველა მხრიდან წაუსვით.
9. ჭიქურის მომზადების დროა. სანამ ჭიქურს ამზადებთ, ტორტი მაცივარში შეინახეთ. კაკაო, შაქარი და წყალი აურიეთ და მიკროტალღურში 30 წამით შედგით.
10. თუ საკონდიტრო ტომარა არ გაქვთ, ჭიქური პარკში ჩადეთ და კუთხე პატარაზე გადაჭერით. ასე ჭიქურს ტორტზე მარტივად გადაიტანთ. დესერტის ცენტრიდან დაიწყეთ და სპირალურად მოასხით, თანდათან დიამეტრი გააფართოვეთ. კანაპეს ჩხირით ცენტრიდან ქვემოთ, ქვემოდან ზემოთ ხაზები გაავლეთ. ერთგვარ ტალღებს მიიღებთ. ისევ 2–3 საათით მაცივარში შეინახეთ. დროა ჩაი მოადუღოთ და ოჯახის წევრები სუფრაზე მიიწვიოთ.
ამ დესერტზე ყველა გიჟდება. ალუბალი შოკოლადის კრემს, ტკბილეულს კარგად ეთავსება, მისი სიმჟავე პროდუქტის შენახვის ვადას ზრდის.
ტორტის მომზადებას მხოლოდ 20 წუთი სჭირდება, დანარჩენ დროს მაცივარში ჩუმად ისვენებს. ოჯახის წევრები ღირსეულად დააფასებენ.
