როგორი ბანალურიც არ უნდა იყოს ჩემი მეუღლის არჩევანი, ბავშვობიდან მისი საყვარელი დესერტია შოკოლადის ტკბილღვეზელი „კარტოფილი“. ამბობს, რომ დედამისი ამ რეცეპტს მხოლოდ 3 ინგრედიენტით ამზადებდა: ფხვიერი ორცხობილა, კაკაო და შესქელებული რძე. დიახ, კლასიკური რეცეპტისგან შორსაა, მაგრამ როგორც ამბობენ, გემოვნებაზე არ დაობენ.
პირადად, მეც „კარტოფილს“ არატრადიციული მეთოდით ვამზადებ. პირველ რიგში, ფხვიერი ორცხობილის ნაცვლად სახლში გამომცხვარ ბისკვიტს ვიყენებ. მას ვუმატებ მოხარშულ მასას, რომელიც დესერტს ფორმის შენარჩუნებაში ეხმარება. Gastronomia.ge-ს რედაქცია დეტალურ ინსტრუქციას გიზიარებთ.
ორიგინალურ რეცეპტში ამ ტკბილეულს შოკოლადის ბისკვიტით ამზადებენ. თუ ბისკვიტის მომზადების დრო და სურვილი არ გაქვთ, შოკოლადის ორცხობილით შეგიძლიათ ჩაანაცვლოთ. გემო განსხვავდება, მაგრამ ასეთი დესერტიც ყურადღებას იმსახურებს.
ინგრედიენტები:
- 185 გ კარაქი
- 1 კვერცხის გული
- 10 გ კაკაოს ფხვნილი
- 40 გ შავი შოკოლადი
- 120 გ შესქელებული რძე
- 2 ს/კ წყალი
- 2 ჩ/კ კონიაკი
მომზადების წესი:
1. დესერტის მომზადებამდე შოკოლადის ბისკვიტის ფენა გამოაცხვეთ. როგორც კი, გაგრილდება, შეფუთეთ და მთელი ღამით მაცივარში გააჩერეთ.
2. მეორე დღეს კრემის მომზადება დაიწყეთ. კვერცხის გული სქელძირიან ღრმა ტაფაზე მოათავსეთ, წყალი დაუმატეთ და აურიეთ. შესქელებული რძე დაუმატეთ და კვლავ აურიეთ.
3. მასა სუსტ ცეცხლზე გასქელებამდე ხარშეთ. ახლა თასში გადაასხით და პარკი დააფარეთ. ოთახის ტემპერატურამდე გააგრილეთ.
4. 160 გრამი რბილი კარაქი მიქსერით ათქვიფეთ. 3 ეტაპად მოხარშული მასა, 1 ჩ/კ კონიაკი და კაკაო დაუმატეთ. გლუვი და ფაფუკი კრემი უნდა მიიღოთ. ბისკვიტი ნაფშვენის მისაღებად ბლენდერით დააქუცმაცეთ.
5. ბისკვიტის ნაფშვენი და კრემი ერთგვაროვანი მასის მიღებამდე აურიეთ. მიღებული ცომიდან ბატონები გააკეთეთ. პრინციპში, ნებისმიერი ფორმა შეგიძლიათ მისცეთ.
6. “კარტოფილი“ მაცივარში რამდენიმე საათით შეინახეთ, რომ გამაგრდეს. ბოლოს ჭიქური მოამზადეთ. შოკოლადი გაადნეთ და 25 გ კარაქი აურიეთ. ამ ჭიქურით მიღებული ნამცხვრები დაფარეთ.
მითითებული ინგრედიენტების რაოდენობით 300 გრამი კრემი გამოდის. თუ ფხვიერი ორცხობილის გამოყენებას აპირებთ, კრემზე ცოტა მეტი დაგჭირდებათ. ასე დესერტი ფორმას შეინარჩუნებს, ხოლო მაცივარში ნებისმიერ შემთხვევაში გამაგრდება. რაც შეეხება ჭიქურს, პირადად რძიანი მიყვარს, მაგრამ ეს გემოვნების საკითხია.
