დღეს ძალიან გემრიელ შოკოლადის ტორტს მოვამზადებთ. უნაზესი გულსართი და საოცარი არომატი ნებისმიერ ადამიანს მოხიბლავს. აუცილებლად მოამზადეთ.
ინგრედიენტები
ცომისთვის
- ფქვილი 250გ
- გამაფხვიერებელი 1 ჩაის კოვზი
- კაკაო 60გ
- შაქარი 200გ
- სოდა 1 ჩაის კოვზი
- მარილი 0,5 ჩაის კოვზი
- ვანილი
- კვერცხი 3 ცალი
- მცენარეული ზეთი 120მლ
- ცხელი წყალი 200მლ
კრემისთვის
- კვერცხი 1 ცალი
- რძე 500მლ
- შაქარი 150გ
- სიმინდის სახამებელი (ფქვილი) 50გ
- კაკაო 40გ
- კარაქი 180გ
დასანამი მასა
- წყალი 120მლ
- შაქარი 20გ
- სურვილისამებრ რომი/კონიაკი
მინანქარი
- კარაქი 30გ
- რძე 30მლ
- შოკოლადი 60გ
მომზადება
- ღრმა ჯამში მოათავსეთ მშრალი ინგრედიენტები. გაცრილი ფქვილი, გამაფხვიერებელი, შაქარი, სოდა, მარილი და ვანილი.
- მიღებულ მასას დაუმატეთ 3 კვერცხი და მცენარეული ზეთი. კარგად მოურიეთ.
- საშუალო ჯამში ჩაყარეთ კაკაო, დაასხით ცხელი წყალი, მოურიეთ.
- ცხელი სახით დაუმატეთ საერთო მასას. მოურიეთ და გახადეთ ერთგვაროვანი.
- საცხობ ფორმაში ჩააფინეთ ქაღალდი, ხოლო გვერდები არ დაამუშაოთ არაფრით.
- ჩაასხით ცომი ფორმაში.
- პირველი 25 წუთი ბისკვიტი ფოლგის ქვეშ უნდა გამოვაცხოთ. ფორმას დააფარეთ ფოლგა და დაჩხვლიტეთ რამდენიმე ადგილას. 170-180 გრადუსზე გამოაცხვეთ და 25 წუთის შემდეგ მოხსენით ფოლგა.
- საერთო ჯამში 50 წუთი სჭირდება ბისკვიტს გამოსაცხობად.
კრემი
სქელ ქვაბში ჩაყარეთ შაქარი, სახამებელი, კაკაო. დაუმატეთ ცოტა რძე და 1 კვერცხი. კარგად მოურიეთ და გახადეთ ერთგვაროვანი. დაუმატეთ დარჩენილი რძე. ქვაბი დადგით მაღალ ცეცხლზე და მოხარშეთ მასის შესქელებამდე. როგორც კი მასა დაიწყებს გასქელებას, დაუკელით ცეცხლს. განუწყვეტლივ ურიეთ კრემს. ადუღებული კრემი 1 წუთის შემდეგ გადმოიტანეთ ცეცხლიდან.
ჩაასხით პატარა ჯამში, დააფარეთ პაკეტი ისე, რომ ეხებოდეს კრემის ზედაპირს და დაელოდეთ მის ოთახის ტემპერატურამდე გაგრილებას.
ბისკვიტის დანამვა
- წყალს დაუმატეთ შაქარი და რომის არომატიზატორი. წყალი შეგიძლიათ ალკოჰოლით ჩაანაცვლოთ. თუ ნამიანი ბისკვიტი არ გიყვართ, მაშინ არ არის საჭირო მისი დანამვა საერთოდ.
- პატარა ჯამში მოათავსეთ დარბილებული კარაქი და ათქვიფეთ ამოფუებამდე 3-4 წუთი. დაუმატეთ მოხარშული შოკოლადის მასა (კრემის ფუძე). მასას მიეცით ერთგვაროვანი კონსესტენცია.
- ცოტა კრემი გადაინახეთ დესერტის გასაფორმებლად.
- ბისკვიტი გაყავით 3 ნაწილად. ბისკვიტის ნაწილები დაფხვენით გასაფორმებლად.
- პირველი ფირფიტა დანამეთ და წაუსვით კრემი. ზემოდან დაადეთ მეორე ფირფიტა და ისიც ანალოგიურად მოამზადეთ. მესამე ფირფიტაც დაფარეთ კრემით.
- დაასვენეთ ტორტი მინიმუმ 4 საათი.
- ახლა კი შეგიძლიათ გააფორმოთ დესერტი.
- გაფორმებული ტორტი შეინახეთ მაცივარში.
მინანქარი
- ქვაბი დადგით ცეცხლზე, ჩაასხით რძე, დაუმატეთ კარაქი და გააცხელეთ. ცხელ მასას დაუმატეთ შოკოლადი. მოურიეთ.
- ტორტს ცენტრში მოასხით მინანქარი და გადაანაწილეთ ზედაპირზე.
- ტორტის გვერდები დაფარეთ კრემით და მოაყარეთ დაფხვნილი ბისკვიტი.
გემრიელად მიირთვით!
